Administrazioa hobetu eta modernizatzeko konpromisoa hartu du Gobernuak, herritarren beharrizanei erantzun egokia eman ahal izateko. Konpromiso horren arabera, neurri batzuk ezartzea pentsatu da, zerbitzu publikoen kalitatea areagotze aldera.

Uztailaren 16ko 1259/1999 Errege Dekretuak (gaur egun indarrik gabe), Zerbitzu-gutunak eta Estatuko Administrazio Orokorraren baitan Kalitateari emandako Sariak arautu zituen. Dekretu horren bidez ezarri ziren herritarrei zerbitzua ematearen printzipioa garatzeko Estatuko Administrazioa osatzen duten erakundeek aplikatu beharreko eduki eta estrategiak, bai eta erakunde horien prozedura, zerbitzu eta prestazioetan etengabeko hobekuntza bermatzeko bideak ere.

Estatuko Administrazio Orokorrarentzako aipatu Kalitate Plan hori 951/2005 Errege Dekretuaren onarpenaren bidez berrikusi eta zabaldu zen. Azken horrek ezarri zuen Estatuko Administrazio orokorraren kalitatea hobetu eta akatsak zuzentzeko esparru orokorra. Esparru berri horrek Estatuko Administrazio Orokorreko zerbitzu publikoak sustatu eta etengabe elkarreraginez hobetzeko oinarrizko sei programa koordinatu eta bateratzen ditu. Eragile guztiek parte hartu dute zeregin horretan: erabakitzaile politikoek eta goi-mailako organoek, kudeatzaileek eta gizarte zibilak.