Ebaluazio orok sistema berberari jarraitu ohi dio: behaketa, neurria, analisia eta
interpretazioa. Horrek guztiak esku hartze publikoa egin behar den ala ez jakitea du helburu, bai
arau baten bidez, programa bidez, plan nahiz politika bidez. Ebidentzietan oinarritutako
balorazioko irizpena egiten da, beraz, diseinuari dagokionez, praktikan jartzeari buruz, eta baita
efektu, emaitza eta eraginen inguruan ere. Ebaluazioaren azken helburua da erabilgarria izatea, bai
erabakitzaileentzat, bai kudeatzaile publikoentzat, bai herritarrentzat.
Planteamendu eta joera guztien aniztasuna onartuta, eta ebaluazioaren azken helburua
(gizarte-onura) ahaztu gabe, honako puntuak hartu behar dira kontuan politika publikoen
ebaluazioari dagokionez:
- Nortasun propioa duen berariazko jarduera da ebaluazioa. Gainera, antzeko beste batzuetatik
desberdindu beharra dugu, hala nola, barne-kontrola, finantza-ikuskaritza, kudeaketa-ikuskaritza
edota aurrekontu-kontrola. Hala ere, esan beharra dago bata eta besteak elkarren osagarriak
direla.
- Agentziaren ustez jarduera instituzionala da ebaluazioa, gobernatzeko proiektu politiko baten
baitan sartu beharrekoa, administrazioa modernizatu eta berritzeko helburua duena.
- Ebidentzia eta erreferentziazko irizpideetan oinarritutako baloraziozko irizpenak barne hartzen
ditu ebaluazioak, eta ez legoke azalpen edota neurketa xume baten bidez ordezkatzerik.
- Ebaluazioak gizarte zientzietako tresnak erabiltzen ditu (kuantitatiboak eta kualitatiboak),
bai eta kudeaketa-publikorako teknikak ere. Informazioa tratatzeko metodo zorrotza aplikatzen du,
sistematikoki, aztertzen diharduen errealitatea ahalik eta hoberen ezagutze aldera.
- Ebaluazioa diseinuaren edota aplikazioaren ingurukoa izan daiteke, bai eta esku hartze publikoa
garatu eta burutzeari buruzkoa ere. Aztertzen duen esku hartze publikoaren gaineko ikaskuntza eta
ezaguera integrala lortu nahi du.
- Politika eta demokrazia aldeei erantzungo die (gobernuaren erantzukizun eta gardentasuna), bai
eta estrategia eta kudeaketa alderdiei ere (hobekuntza erabakiak hartu eta kudeaketa
burutzerakoan).
- Ez da iraganari begira dagoen tresna eragiletzat bakarrik hartuko, garai batean bezala;
aitzitik, Estrategia eta prospekziorako tresna gisa ere erabili nahi da.
- Ebaluazioa pluralista dela esan ohi da, eragile garrantzitsuenen atzemate eta balorazio
mekanismoen gain arbitro-lanak burutzen baititu.
- Gizarteari zerbitzu hobea ematea du azken helburu, sektore publikoa eragingarriagoa bilakatu
eta kalitate demokratikoa perfekzionatuz.
