O novo marco integra de forma coordinada e sinérxica seis programas para impulsar a mellora continua dos servizos públicos na Administración Xeral do Estado, mediante a participación dos distintos actores interesados: decisores políticos e órganos superiores, xestores e sociedade civil. Son os seguintes:

- Programa de Análise da demanda e avaliación da satisfacción dos usuarios.
- Programa de Cartas de Servizos.
- Programa de Queixas e Suxestións.
- Programa de Avaliación da Calidade das Organizacións.
- Programa de Recoñecemento (Certificación de Organizacións e Premios).
- Programa do Observatorio da Calidade dos Servizos Públicos.

Para o desenvolvemento dos programas de calidade, elaboráronse unhas guías prácticas con instrucións operativas de carácter orientativo, que conteñen os correspondentes criterios metodolóxicos e de xestión e que ademais incorporan aspectos de índole normativa para a aplicación e desenvolvemento do Real Decreto 951/2005.

Por Resolución do 6 de febreiro de 2006 da Secretaría Xeral para a Administración Pública, aprobáronse as directrices para o desenvolvemento dos programas do marco xeral para a mellora da calidade, establecido no Real Decreto 951/2005, do 29 de xullo.

Por outro lado, e en virtude da autorización contida na Lei 28/2006, do 18 de xullo, de Axencias Estatais para a mellora dos servizos públicos, o Real Decreto 1418/2006, do 1 de decembro de 2006, polo que se aproba o Estatuto da Axencia Estatal de Avaliación das Políticas Públicas e a Calidade dos Servizos, modificou o Real Decreto 951/2005, definindo cales das competencias e facultades asignadas previamente á Secretaría Xeral para a Administración Pública serán exercidas pola Axencia Estatal de Avaliación das Políticas Públicas e a Calidade dos Servizos. A Axencia asume parte das funcións de “xestión e prestación de servizos” ás organizacións da Administración Pública (asesoramento, normalización metodolóxica, avaliacións, certificacións) e á cidadanía (canalizado a través do Observatorio da Calidade dos Servizos Públicos).