Entre as experiencias avaliadoras máis destacadas na Administración Xeral do Estado (AGE) atópanse as centradas en políticas sociais, sanitarias, educativas e tecnolóxicas, preocupadas pola eficacia dos programas e o seu impacto social e/ou calidade dos servizos prestados, todas elas de ámbito sectorial e especializado. É o caso dos traballos realizados en materia educativa por ANECA - Axencia Nacional de Avaliación da Calidade e a Acreditación - e o Instituto de Avaliación (antigo INECSE), pola Axencia de Calidade do Sistema Nacional de Saúde en materia sanitaria, polo INEM e o Servizo Público de Emprego Estatal en materias laborais e de emprego, pola ANEP – Axencia Nacional de Avaliación r Prospectiva - no sistema público de ciencia e tecnoloxía e de proxectos de I+D+i, ou pola Dirección Xeral de Planificación e Avaliación de Políticas de Desenvolvemento en materia de cooperación internacional ao desenvolvemento.

Non hai que esquecer, así mesmo, as valiosas achegas doutras institucións públicas e privadas que desenvolven labores relacionados coa avaliación (Sociedades de avaliación, Institutos de investigación, Universidades…) e as actividades de avaliación desenvolvidas por algunhas Comunidades Autónomas e pola Administración local.

Existen ademais, entre outras, as seguintes experiencias de referencia:

• A avaliación da asignación e emprego dos fondos comunitarios realizada polo Ministerio de Economía e Facenda en virtude da regulación comunitaria na materia.
• As avaliacións da calidade dos servizos impulsadas polo Ministerio de Administracións Públicas nun esforzo de elevar a satisfacción da cidadanía en tanto que clientes dos organismos públicos, así como o labor das Inspeccións de Servizos en todos os ámbitos territoriais da Administración.
• O control orzamentario, contable, de legalidade e a avaliación de políticas do gasto e subvencións que desenvolven a Dirección Xeral de Orzamentos e a Intervención Xeral da Administración do Estado desde o Ministerio de Economía e Facenda.
• As funcións, fiscalizadora e xurisdicional, coas que o Tribunal de Contas desenvolve o control externo da actividade económica-financeira do sector público.
• Ao anterior poderían engadirse as funcións de avaliación ex ante ou de análise do impacto das intervencións, recollidas en memorias xustificativas e económicas que se deben redactar con ocasión das propostas normativas gobernamentais.